បរទេស៖ មុននេះបន្តិច ក្រុមហ៊ុន Mazda ទើបតែបង្ហាញមុខពេញរបស់ CX-90 ស៊េរី២០២៤ រូបរាងស្អាតខ្លាំងមែនទែន ជាមួយចង្កៀងឌីហ្សាញបែបថ្មី យុវវ័យច្រើនជាងយុវចាស់ និងមានការដាប់ដេតច្រើនលើម៉ាស៊ីន e-skyactive កាន់តែធ្វើការល្អជាង e-skyactive របស់ CX-9 ជាពិសេសមានម៉ាស៊ីនសាំងពាក់កណ្ដាលអគ្គិសនីថែមទៀតផង។
ចំពោះទីផ្សារកម្ពុជាប្រេនឡាន Mazda របស់ជប៉ុនមួយនេះ ត្រូវបាននាំចូលតាមច្រកក្រុមហ៊ុនធំមួយ HGB Group ដែលនាំសិទ្ធផ្តាច់មុខរាល់ឡានស៊េរីថ្មីរបស់ Mazda ប៉ុន្តែយើងសង្កេតឃើញថា សម្រាប់ទីផ្សារស្រុកខ្មែរមានតែ CX-2, CX-3, CX-5, CX-6 និងCX-9 ជាដើមដែលកំពុងតែចរាចរណ៍ពេញទឹកពេញដីតែម្តង ប៉ុន្តែសម្រាប់ម៉ូដែលឡានដែលមានលេខ២ខ្ទង់ដូចជា CX-50, CX-60 និងCX-90 គឺឃើញមុខនៅខ្មែរយើងទេ មិនដឹងជាកាល ទើបខាង Mazda Cambodia គាត់យកលក់ឡើយ។
ត្រឡប់មកវិញ សម្រាប់ Mazda CX-90 ស៊េរី២០២៤ ទៅលើPlatform ឬតួឡាន ត្រូវបានខ្ចីពី MX-5 Miata ដែលជាប្រភេទឡានបែបស្ព័របើកដំបូល ដោយយកមកបំពាប់លើឡាន SUV មួយនេះ។
ដោយឡែកសម្រាប់ការប្រើប្រាស់ម៉ាស៊ីនទៅលើ CX-9 ត្រូវបានប្រើជាមួយម៉ាស៊ីនចំណុះ ២,៥លីត្រ ៤សីឡាំង អាចបង្កើតកម្លាំង ២៥០សេះ និងកម្លាំងរមូរ ៤៣៤ ញ៉ូតុនម៉ែត្រ សម្រាប់ option ប៉ុង១។ ចំណែកឯខាង CX-90 ចេញមកលើកនេះ គឺមានកម្លាំងម៉ាស៊ីន ២ជម្រើស ដោយជម្រើសទី មានម៉ាស៊ីន ៣,៣លីត្រ ស៊ីឡាំងបញ្ឈេរ ៦ មានបំពាក់ជាមួយនឹងម៉ាស៊ីនស្អំ Turbocharged ថែមទៀត មិនតែប៉ុណ្ណោះទៅលើកម្លាំងម៉ាស៊ីន គឺមានចំនួន ៣៤០សេះ និងកម្លាំងរមួរ ៥០០ញ៉ូតុនម៉ែត្រ បន្ថែមជាមួយម៉ាស៊ីនកូនកាត់ ៤៨វ៉ុល មួយទៀតជំនួយដល់កម្រិតសន្សំសំចៃ។
រីឯជម្រើសម៉ាស៊ីនទី២ សម្រាប់ Mazda CX-90 នេះ ត្រូវបានក្រុមអ្នកផលិតឡានជប៉ុនសម្រឹតសម្រាងជាពិសេសតែម្តង ដោយបានបន្ថែមនូវម៉ូទ័រអគ្គិសនី ១គ្រឿងអបជាមួយម៉ាស៊ីនសាំង ដោយបង្កើតបានជាបច្ចេកវិទ្យាមួយហៅថា Plug-in Hybrid ដែលជាម៉ាស៊ីនពាក់កណ្ដាលអគ្គិសនីហៅថា PHEV អាចសាកថ្មបានដូចឡានអគ្គិសនីប្រភេទ BEV ប្រើសុទ្ធផងដែរ។
ដើម្បីឲ្យឡានកាន់តែសន្សំសំចៃខ្លាំង Mazda បានសម្រេចចិត្តរក្សា DNA ម៉ាស៊ីនដើមរបស់ CX-9 មកប្រើ រួមផ្សំជាមួយនឹងម៉ូទ័រអគ្គិសនីផងនោះ កម្លាំងឡានទាំងមូល អាចបង្កើតបាន ៣២៣សេះ និងកម្លាំងរមូរ ៥០០ញ៉ូតុនម៉ែត្រ ធំជាងកម្លាំង CX-9 ឆ្ងាយណាស់ ណាមួយសម្រាប់ CX-90 ដែលមានស្លាក e-Skyactiv PHEV នេះ ព្រមទាំងបានបំពាក់អាគុយទំហំ ១៧,៨គីឡូវ៉ាត់ម៉ោង ដោយអាចរត់លើថាមពលថ្មតែឯ បានចម្ងាយ ៦២គីឡូម៉ែត្រ។ ហើយនៅលើ CX-90 ស៊េរី២០២៤ ទាំងអស់ត្រូវបានបំពាក់ប្រអប់លេខប្រភេទ Multi-plate ៨វគ្គអូតូ ដូចគ្នា។
សម្រាប់រូបរាងផ្នែកខាងក្រៅ Exterior របស់ឡាន SUV នេះមិនខុសគ្នាពី CX-9 ឡើយ គ្រាន់តែប្រវែងនិងមាឌធំជាងគ្នាបន្តិចតែប៉ុណ្ណោះ ។ ទៅបាណាខាងមុខ ត្រូវបានឌីហ្សាញតូចល្អិតៗ ខុសប្លែកពីបាណាបែបបន្ទាត់ឆ្នូតរបស់ CX-9 និងចង្កៀងសងខាងត្រូវបានបំពាក់ជាភ្លើង LED ១គ្រាប់អមជាមួយភ្លើងស រចនាដូចភ្នែកដក់។
ចំណែកឯផ្នែកខាងក្នុង interior ត្រួសៗ គ្រប់ត្រកូល CX ទាំងអស់ត្រូវបានបំពាក់ជាមួយនឹងអេក្រង់ឌីជីថល Media ១០,៣អ៊ីញនិងអេក្រង់កំសាន្តទំហំ ១២,៣អ៊ីញ ។ហើយសម្រាប់កៅអីអង្គុយវិញ គឺមាន ៣ជួរ អាចដាក់មនុស្សបានពី ៦ទៅ ៨នាក់អាស្រ័យលើទំហំរបស់មនុស្ស ដោយឡែកកៅអីនេះដែរ គឺមានប្រណិត អមជាមួយតាប្លូក៏ត្រូវបានដេរជាមួយក្រណាត់កម្រិតខ្ពស់ស្អាតទាន់សម័យ។
ចំណែកឯតម្លៃវិញនៅក្រៅស្រុកទំហំសាច់ប្រាក់ចាប់ផ្តើមពី ៤០០០០ដុល្លារឡើងទៅ ប៉ុន្តែសម្រាប់បន្ថែមគ្រឿងតុបតែង ឬគ្រឿងលេងឲ្យឡានកាន់តែស្អាត ទឹកប្រាក់អាចឡើង ១០០០០ដុល្លារថែមទៀត៕
